Освен новинарката на Далматински портал, пред црквата во сплитската населба Сиробуја денеска е нападната и снимателката на на телевизијата Н1.

Инаку, во католичката црква на Сиробуја, сплитскиот градски котар, дојде до инцидент. И покрај предупредувањето од Сплитско – макарската надбискупија и прекршочната пријава од полицијата, во таа црква освен мисата на Цветници и денеска се одржа миса по повод празникот Велигден. Новинарите кои дојдоа пред црквата се нападнати.

„Нашата колешка беше изложена на бројни навреди не само од свештеникот Јосип Делаш, туку и од насобраните граѓани. Еден од нив, од својот автомобил и со очигледна намера, тргна и во физички напад на нашата снимкателка, што е документирано и забележано на снимките. Податоците за нападот и сите информации ги проследивме до Министерството за внатрешни работи. Изразуваме целосна солидарност со сите нападнати новинарки и новинари и ѝ даваме целосна заштита и помош на нашата снимателка“, објавија на порталот на телевизијата Н1.

Претходно пред оваа црква беше нападната новинарката на Далматински портал и скршен мобилниот телефон со кој таа вршеше директен пренос од велигденската миса иако во цела Хрватска се забранети секакви јавни собирања поради ширењето на коронавирусот.