Кадетките без полуфинале на ЕХФ шампионатот во Италија
Кадетките претходно имаа две победи над Белорусија и Азербејџан, а денеска го претрпеа и вториот пораз на шампионатот, после оној стартниот од домаќинот Италија.
Во последното четврто коло од групата Б загубија избраничките на селекторот Симе Симовски од пресилната Полска со 34:20.
Ривалот отвори со гол на почетокот, ние вративме со иста мерка преку Ѓорѓиевска која доби одлична асистенција од Дамјановска. Ривалот успеа да врзе два гола и се одлепи на 3:1, по една интервенција на Грујовска награди Седлоска со гол за 3:2. Противникот се врати на два предност поведувајќи со 4:2, а потоа ги имавме нашите минути. Во игра клупата ја уфрли борбената Коларовска која играше како најистурена при дефанзива каде користевме формација 5-1.
Таа внесе храброст во играта и во напад против корпулентниот ривал. Испрати до колешките Коларовска две асистенции и доби пенал кој го претвори во гол Седлоска за наше водство од 6:5 во 11.минута. Оттука натаму следуваше голем пад на концентрацијата, нашите ракометарки едноставно не можеа „да се пронајдат“ во делот на нападот и одбраната. Полската селекција сето тоа го користеше и замина на одмор со резултат 16:8.
Во вториот дел ништо не се промени, само се зголемуваше негативата, со овој пораз Македонија и на крајот останавме без полуфинале на ЕХФ шампионатот. Капитенот Сара Миновска која имаше четири голови после дуелот го доби признанието за највреден играч (МВП).
Останува сега само разигрувањето за пласман од 5-8 место, а прв ривал в сабота ќе биде Турција од 15.00 часот.