Јувентус си најде тренер за следната сезона
Екипата на Јувентус во текот на минатата недела остана без тренер, но управата веќе неколку недели води тајни преговори со тренерот кој котира највисоко на листата на желби на раководството.
Според италијанските и англиските медиуми, нов тренер на Јувентус ќе биде сегашниот стратег на Тотенхем, Маурицио Покетино. Италијанскиот шампион чека да се одигра финалето на Лигата на шампионите (1 јуни) и официјално да објави дека Аргентинецот е наследникот на Масимилијано Алегри, кој по пет години, во петокот го напушти Јувентус.
Покетино договорил тригодишна соработка со „старата дама„ вреден 12 милиони евра и веќе му ја соопштил својата одлука на претседателот на Тотенхем, Даниел Леви.
Проблем во реализација на трансферот може да претставува клаузулата од 40 милиони евра за „слободата“ на Тотенхем, но ниту тренерот ниту Јувентус имаат намера да ја платат целата сума.
И двете страни се надеваат дека Тотенхем со пласманот во финалето на ЛШ направил огромен успех и поради тоа треба на Покетино да му биде дозволено да си замине.
Доколку не успеат да се договорат со Леви, челниците на Јувентус се подготвени да чекаат една година и другото лето да го ангажираат Покетино, а како преодно решение се споменува сегашниот тренер на Лацио, Симоне Инзаги.