Јуниорската кошаркарска репрезентација на Македонија загуби од Хрватска со 72:59 во натпревар за освојување на 13 позицијата на Европското првенство до 18 години што се игра во Измир и испаднаа од елитата.

Избраниците на селекторот Тони Симиќ на крајот го освоија 14 место што значи испаѓање од А-дивизијата и заедно со селекциите на Црна Гора и Велика Британија ќе игра во Б-дивизија.

Младите кошаркари одлично го отворија натпреварот, беа подобар противник и благодарение на шутот од далечина успеа да ја добие првата четвртина со 19:15. Но, Хрватите се разиграа во втората четвртина, ги оставија избраниците на Симиќ на само седум постигнати поени и на одмор се замина со 35:26 за „коцкестите“.

Во второто полувреме, Хрватите рутински ја одржуваа предноста и на секоја серија на македонските кошаркари одговараа со своја и на крајот славеа со 72:59 и си обезбедија опстанок во А-дивизијата.

Теодор Симиќ забележа нов дабл-дабл од 21 поен и 12 скокови, по 14 поени постигнаа Димитриевски и Бошалески но тоа беше премалку за да избегне поразот кој значеше испаѓање од елитата.