Јовески ја овласти обвинителката Ленче Ристова да го застапува случајот „Талир 2“
Државниот јавен обвинител Љубомир Јовески ја овласти обвинителката од СЈО Ленче Ристова да го застапува случајот „Талир 2“ пренесува Нова ТВ.
Судењето за „Талир2“ треба да започне утре откако претходното рочиште беше одложено поради отсуство на адвокатите на обвинетите. Во случајот „Талир 2“ обвинети се Никола Груевски и Кирил Божиновски, кои, со злоупотреба на службената положба, овозможиле правното лице ДГ Бетон АД Скопје да го изгради седиштето на политичката партија ВМРО-ДПМНЕ.
И покрај тоа што за правното лице ДГ Бетон АД Скопје важеле ограничувањата од Законот за финансирање на политички партии, сепак обвинетите договориле несразмерна корист за политичката партија ВМРО-ДПМНЕ во однос на обврските кои ги имало правното лице ДГ Бетон АД Скопје.
На ваков начин, а спротивно на законските прописи, обвинетите прибавиле значителна имотна корист за политичката партија ВМРО-ДПМНЕ во износ од 507.164.424,00 денари, односно 8.246.576 евра.