Кошаркарите на Денвер се пласираа во полуфиналето од НБА плеј-офот на Западната конференција после победата над Јута со 80:78 во одлучувачкиот седми натпревар.

Клучните поени ги постигна српскиот центар Никола Јокиќ на 27.8 секунди до крајот во дуелот со Руди Гобер.

„Џезерите“ имаа уште доста време да направат и пресврт, очекувано топката дојде до Донован Мичел кој се обиде да израмни, но ја загуби топката и тогаш беа решени сите дилеми околу победникот.

Јокиќ беше на висина на задачата, освен што ги постигна одлучувачките поени, беше и најефикасен на мечот со 30 поени, 14 скока и четири асистенции.

На спротивната страна најрасположен беше Мичел со 22 поени. Нареден противник на екипата на Денвер ќе биде Лос Анџелес Клиперс во конферециското полуфинале.

Бостон со триумфот од 102:99 поведе во полуфиналето на Источната конференција и со 2:0 против Торонто, прв стрелец кај Селтикси беше Тејтум со 34 поени (осум скока, шест асистенции), а за Репторси доминираше Ануноби со 20 поени (седум скока).