Словенечкиот премиер Јанез Јанша денеска го повика Уставниот суд да донесе конечна одлука за тоа дали може да се примени одлуката на владата дека во државната администрација можат да работат само оние кои се вакцинирани против ковид-19 или кои ја прележале оваа болест.

Владата во средината на септември донесе одлука за задолжителна вакцинација, но таа не е имплементирана бидејќи Уставниот суд ја суспендираше со мнозинство гласови до конечна одлука, а по жалбата на синдикатот на вработените во јавната администрација дека таа е неуставна.

– Слична одлука донесоа неколку влади во Европа, во земји каде епидемиолошката состојба е подобра од Словенија. Владата сега не знае дали да се однесува како другите кои се поуспешни во борбата против епидемијата од нас или да се помири со ситуацијата, каква и да е таа, одговори денеска Јанша на прашањето од пратеник од неговата партија за тоа како владата ќе го спречи ширењето на епидемијата. Тој потенцираше дека деновиве Австрија донела многу драстични мерки кои се применуваат за невакцинираните.

Јанша на Твитер ја коментираше одлуката на Уставниот суд за привремено суспендирање на обврската за вакцинирање во јавната администрација, која постепено треба да се прошири и на другите делови од населението, наведувајќи дека уставните судии кои одлучиле да го направат тоа ќе бидат „ соодговорни” за зголемениот број заразени и смртни случаи.

Јанша го критикуваше и образложението на Врховниот суд дека правилото за задолжително носење маски во затворени простории не е донесено врз основа на вистински правен акт, туку со обичен владин декрет.

Извор: МИА