Кошаркарите на Милвоки бакс го совлада Бруклин нетс со 107:96 и израмнија на 2:2 во победи во полуфиналето од плеј-офот во Источната конференција.
Бруклин подобро го започна натпреварот и имаше предност во првата четвртина, како и на стартот од втората, но тогаш Милвоки предводен од Јанис Адетокумпо направи пресврт и предноста не ја испушти до крајот на натпреварот.

Олеснителна околност за Милвоки беше и повредата на бекот на Бруклин, Кајри Ирвинг за кого според првичните проценки, сезоната заврши. Бруклин играше и без Џејмс Харден кој се повреди на првиот натпревар од оваа серија и можно е да се врати во наредниот натпревар.
Најдобар во тимот на Милвоки беше Адетокумпо со 34 поени и 12 скокови, а добра партија прикажа и Крис Мидлтон со 19 поени и осум асистенции. Во редовите на Бруклин, Кевин Дурент беше прво име со 28 поени и 13 скокови.