Власта треба да биде свесна за отстапките што ги прави и за успешен попис и резултати се потребни корекции на тоа што може да се поправи, истакна Стевче Јакимовски, претседател на ГРОМ, во емисијата „24 анализа“ на ТВ 24. Тој го нагласи фактот дека дел од граѓаните одбиваат да се попишат и покрај апелите на политичките партии за неопходноста од спроведување на операцијата. Вели пописот е потребен, но и дека треба да се одложи за два месеца од најавениот термин.

– Ако сакаме да имаме успешен попис и да имаме резултати, треба да се коригира тоа што може да се коригира. Во опасна ситуација сме. Не треба да правиме попис на сила, зошто тоа ќе ни се удри од глава. Народот кога не може да се спротивстави, се повлекува и тоа го искажува на избори, вели Јакимовски кој додаде дека е можен и бојкот, доколку има и најмала сомнеж кај граѓаните.

Тој изнесе низа забелешки, како на пример терминот на спроведување. Јакимовски е за поместување за два месеца што го образложи со безбедноста и на попишувачите и на домаќините, бидејќи ќе може да се седи на отворено, на тераси или дворови.

Го нотира и врзаниот потпис со што државата, вели, се прави бинационална.

– Со тој врзан потпис полека правиме сè. Па, доколку една етничка заедница не биде задоволна со резултатите, нема да ги потпише, коментира лидерот на ГРОМ.

Јакимовски се осврна и на фингер принтот, поточно пописот да се реализира со отпечаток од прст. Се прашува „што е проблемот за техниката да се набави неколку месеци порано, кога веќе се планира да се употребува за локалните избори наесен“.