По консолидацијата на општинскиот буџет, наредната година ќе има многу инвестиции, проекти и реконструкции во Карпош, најави градоначалникот Стевчо Јакимовски. Како што вели тој, ќе се зголеми бројот и количината на средствата за реконструкција на лифтови и кровови, а нарачани се и 20 проекти за реконструкции на улици, од кои дел се веќе подготвени и тоа за улиците Козле 12, Козле 14, Козле 16, Козле 20, сите во Нерези.

 Ќе пробиваме дел од улица Влае, кај Тутунскиот комбинат. Атмосферска канализација и реконструкција на паркинзи на улица Јуриј Гагарин позади „Канцона“, како и реконструкција на таа улица. Изградба на улица Скупи 3, Скупи 20. На Козле 3, тоа е во Нерези, водоводна мрежа и ќе се стави нов асфалт, како и крак од улицата Теодосиј Синаитски во Жданец, покрај изградба на водовод и асфалтирање, ќе се прави и потпорен ѕид во тој дел – најавува Јакимовски.

Покрај ова, тој информира и дека ќе се реконструира улицата Загребска и ќе се гради потпорен ѕид, како и крак на улица Бањалучка во Тафталиџе 2, и паркинг на Његошева во Тафталиџе. Во исто време, како што рече, се подготвуваат повеќе проекти за изградба на новопроектирани улици во населбата Бардовци. Изработени се и проекти за реконструкција на фасади.

Јакимовски вели дека во наредниве две месеци ќе се одржат средби со граѓаните по месните заедници, за заеднички да се подобри програмата за наредната година.
.