Градоначалникот на Општина Карпош, Стевчо Јакимовски, на денешната седница на Советот ги повлекол од дневен ред точките предложени од негова страна, информираа советничките од „Независни за Карпош – За заштита на Карпош“.

Веднаш по неговото излагање сакавме да ја предложиме нашата точка на дневен ред, но на прашањето дали може и како понатаму да продолжиме од одговорната за поддршка на Совет ни беше кажано да си прочитаме деловник. По паузата за договарање и разјаснување сите вработени од општината си отидоа со што немавме можности да ја продолжиме седницата – велат од граѓанската иницијатива.

Според нив, одбивањето на давање стручна помош, толкување и други информации од стручните лица во Сектор за поддршка на Советот е доказ дека наместо поддршка на Советот, тие, како што велат, станале поддршка на своеволното однесување на градоначалникот.

Не добивме објаснување која е причината за ваквиот акт на градоначалникот, се сомневаме дека тоа беше токму нашиот предлог: Предлог – Одлука за изготвување стручен елаборат за суспензија на применувањето за блок 08 од ДУП за Градска четврт 3 05 помеѓу булевар Илинден, булевар 8 Септемри, булевар Партизански одреди и улица Љубљанска, донесен со одлука на Совет 07-7546/4 од 06.11.2013, Општина Карпош. Вчера беше уредно испратен до сите советници и службата за поддршка на советот – информираат од „Независни за Карпош“.

За денешните случувања се огласи на фејсбук и претседателот на Советот на Општина Карпош, Бранко Ристов.

Стевчо втор пат оневозможува седница кога се гласаат точки за ДУП-ови а не му се во интерес – напиша Ристов.

Од Општина Карпош до овој момент нема одговор која е причината за ваквата постапка на градоначалникот Јакимовски.