Населбите во општина Карпош повеќе нема да бидат во целосна телница од 1 часот по полноќ до 5 часот наутро. Општината продолжува со штедење на струјата, но го менува моделот на штедење по барање и по предлог на жителите.

Урбаните заедници во општината одржаа состанок и предложија да има улично осветлување цела ноќ, но да свети секоја втора светилка, а во 4. 30 часот наутро да се гаснат светилките.

Како што информира градоначалникот Стевчо Јакимовски, овој модел на штедење е прифатен, откако претходно се консултирал со Одделението за енергетска ефикасност и фирмата која го одржува осветлувањето, за да се види дали постои таква техничка можност.

Ме уверија дека постои техничка можност. Тоа значи дека веќе од викендов ќе започнеме со преориентирање на светлото, така што секоја втора светилка ќе свети во текот на ноќта, а уличното осветлување ќе се гаси во 4.30 часот – рече Јакимовски.

Жителите на Карпош неколку недели реагираа поради тоа што после 1 часот по полноќ комплетно се гасеше уличното осветлување како мерка за штедење струја, поради што граѓаните се чувствуваа небезбедно.