Денот започна со сензационалниот триумф на црногорската тенисерка Данка Ковиниќ над актуелната шампионка на „УС Опен“, Ема Радукану во Мелбурн, а попладнево повторно блеснаа црногорските ракометари!

Тие на стартот од главната фаза на Европското првенство денеска во Будимпешта изненадувачки убедливо ја совладаа репрезентацијата на Хрватска со резултат 32:26.

Освен во првите неколку минути од овој натпревар, црногорската репрезентација цело време имаше водство. На полувремето веќе беше 15:9 за селекцијата на Црна Гора, а најмногу што успеа Хрватска во продолжението беше да заостанува четири голови разлика во неколку наврати.

Бранко и Милош Вујовиќ постигнаа по седум гола во победничката селекција, Грбовиќ ги следеше со пет, а во хрватската репрезентација најефикасен беше Чупиќ со седум гола, додека Лука Циндриќ постигна пет.

За тоа време во групата „2“, Шведска беше подобра од Русија со 29:23.