Српскиот претседател Александар Вучиќ денеска изјави дека донел одлука за помилување на 12 лица и ја направил најголемата грешка откако станал претседател, објавија српските медиуми.

Тој рече дека оваа одлука ја донел неодамна како исполнување на третото барање на студентите.

„Направив нешто за што горко се каам. И ќе се каам цел живот. Не донесов одлука да помилувам ниту едно лице во изминатите осум години откако сум претседател. Донесов одлука да помилувам дванаесет лица и да спречам кривично гонење. И ја направив најголемата грешка откако станав претседател“.

Вучиќ додаде дека толку многу жали „што секоја недела до крајот на мандатот ќе им се извинува на граѓаните на Србија за тоа што го направил“.

Тој изјави дека не давал помилување на некои други лица на кои можеби им требало, туку на оние на кои не му било дозволено да помилува.

Нема да има повеќе помилувања, еднаш ја направив таа грешка“, рече Вучиќ при обраќањето до јавноста од Српското претседателство.