Претставник на „АстраЗенека“, сепак, ќе присуствува на вечерашната средба со претставници на Европската Комисија (ЕК) и земјите-членки на Европската Унија (ЕУ), потврдија дипломатски извори во Брисел.

– Тие рекоа дека немаат ништо ново да кажат, но на крајот извршниот потпретседател на компанијата, Искра Реиќ, рече дека ќе присуствува на состанокот и ја очекуваме, наведуваат изворите од Брисел.

ЕУ издвои 336 милиони евра за „АстраЗенека” за развој на вакцината против ковид-19 и, согласно потпишаниот договор, нарача 400 милиони дози. „АстраЗенека“ требаше да биде првата вакцина со која ќе почне масовна вакцинација во ЕУ.

– Имавме среќа што вакцините на „Фазер“ и на „Модерна“ беа претходно одобрени, бидејќи „АстраЗенека“ може да испорача само една четвртина од дозите планирани за првиот квартал од 2021 година, наведуваат изворите во Брисел.

Според нив, за разлика од „Фајзер“, од каде добиле конкретни одговори за проблемот во производството и надоместокот на вакцините, од „АстраЗенека“, сепак, очекуваат јасен одговор за тоа што се случува со производството и испораката на вакцините од четири фабрики лоцирани во Европа од кои две во Велика Британија.