Израелскиот Парламент денеска му одобри на Министерството за здравство да открива имиња на луѓе кои не биле вакцинирани против ковид-19, предизвикувајќи критики за нарушување на приватноста на граѓаните кои не сакаат да се вакцинираат.

Законот, кој беше донесен со 30 гласа „за” и 13 „против”, им дозволува на локалните власти, генералниот директор на Министерството за образование и на некои вработени во Министерството за социјални работи да ги дознаат имињата на овие лица, нивните адреси и телефонски броеви.

Одредбата, која ќе биде во сила три месеци или додека не заврши пандемијата, има за цел да им дозволи на властите да ги охрабрат луѓето да се вакцинираат обраќајќи им се лично, соопшти Парламентот.

Повеќе од три милиони луѓе во Израел веќе примиле две дози на вакцината на „Фајзер“ и „БајонТек“, што е речиси една третина од околу девет милиони жители во земјата.

Израелската Влада истакна дека нејзина цел е да се вакцинираат 6,2 милиони луѓе до април. Од почетокот на пандемијата, во Израел се регистрирани повеќе од 760.000 случаи на ковид-19, а повеќе од 5.600 луѓе починаа.