Министерот за национална безбедност на Израел Итамар Бен Гвир рече дека изборот на Зохран Мамдани за градоначалник на Њујорк е „срам што ќе се памети засекогаш“, нарекувајќи го „поддржувач на Хамас, отворен антисемит и непријател на Израел“, објави Си-ен-ен.

Поранешниот израелски амбасадор во ОН и САД, Гилад Ердан, напиша на X дека „противник на Израел, кој нè гледа како геноцидна држава на апартхејдот, сега го води најважниот град во светот, дом на најголемата еврејска заедница надвор од Израел“.

Тој додаде дека тоа е „темен ден“ за секој што ја разбира „важноста на сојузот со Соединетите Американски Држави“.

Поранешниот министер за одбрана и надворешни работи, Авигдор Либерман, напиша на X: „Големото јаболко падна“, нарекувајќи го Мамдани „лицето на тивкиот џихад“. Тој ги повика Евреите од Њујорк „кои го ценат животот“ да се преселат „таму каде што припаѓаат, во Земјата Израел“.