Израел и Бахреин потпишаа договор за воспоставување дипломатски односи
Израел и Бахреин денеска одлучија да воспостават официјални дипломатски односи со што малата земја од Заливот стана четвртата арапска држава што ги нормализира односите со Израел.Договорот за воспоставување дипломатски односи, со посредство на САД, беше потпишан на крајот од еднодневната посета на американско-израелската делегација на Бахреин.
Делегацијата на САД ја предводеше министерот за финансии Стивен Мнучин, а израелската делегација беше предводена од Меир Бен Шабат, советник за национална безбедност на Бенјамин Нетанјаху.
Шабат рече дека „првиот официјален чекор за приближување на двете земји” е направен, додавајќи дека делегацијата е примена „со отворени раце” и дека тоа е важен чекор за стабилност и просперитет во регионот.
Како што пренесуваат странските агенции, договорите на Израел со ОАЕ и Бахреин претставуваат дипломатски победи за администрацијата на американскиот претседател Доналд Трамп и Нетанјаху.
Палестинците, сепак, ги критикуваа договорите затоа што долго време се потпираа на единствениот арапски став дека Израел ќе биде признат само кога ќе имаат независна држава.
Договорите одразуваат промена на Блискиот исток, каде заедничката загриженост за потезите на Иран и деловните можности го засенија претстојното решавање на палестинското прашање.
(Извор: МИА)
