Израелскиот премиер Нафтали Бенет денеска најави дека целосно ќе го укине зелениот сертификат бидејќи новите дневни случаи на коронавирус продолжуваат да се намалуваат во таа земја.

По средбата со здравствените власти, Бенет изјави дека израелскиот бран на омикрон е „прекинат“, и дека во земјата претстои дополнително укинување на епидемиолошките мерки, пренесува агенцијата АП.

На луѓето кои имале „зелена пропусница“ (израелски зелен сертификат), на оние кои неодамна закрепнале од коронавирусот или биле вакцинирани со три дози од вакцината, им се дозволува да влезат во затворени простори и да учествуваат во големи собири.

Како што се наведува, иако бројот на нови заразени е сè уште висок, израелското Министерство за здравство известува за постојан пад на сериозните случаи на ковид-19 од врвот на бранот предизвикан од омикрон што беше доминантен во земјата.

Од почетокот на вакцинацијата во земјата, околу 48 отсто од 9,4 милиони луѓе примиле три дози од вакцината Фајзер, а повеќе од 72 отсто од населението примиле најмалку една доза вакцина.

Од почетокот на пандемијата на корона вирусот, најмалку 9.710 луѓе починале како резултат на инфекцијата.