Групната изложба „Сета љубов (All the Love)“ содржи дела, уметнички инсталации и видеа од 11 уметници од земјава и од светски признаени автори, кои изложуваат во водечките уметнички центри низ светот, како „Тејт“, „Бобур“, „Гугенхајм“, „Мома Њујорк“. На изложбата се претставени дела од Кети Чукров (Русија), Хедер Дјуи Харборг (САД), Коко Фуско (Куба), Карлос Мота (Колумбија), Ширин Нешат (Иран), Агњешка Полска (Полска), Рена Редл и Владан Јеремиќ (Србија), Нора Турато (Хрватска), како и македонските уметници Велимир Жерновски и Никола Узуновски.

Кураторки на поставката се Мира Гаќина и Јованка Попова, кои за тематскиот фокус на изложбата посочуваат дека „…дискурсот за љубовта, почнувајќи од авангардната и радикална политика од минатиот век, е во центарот на политичките и социјалните промени поттикнати од женските права, правата на ЛГБТ-заедницата, различните начини на борби на граѓанското општество. Оттука изложбата се фокусира на дела кои ја манифестираат нејзината способност да се пробие низ најсилните спротивставувања и радикалните поделби“. Изложбата „Сета љубов“ ги анализира состојбите на единство и солидарност во локалниот и глобалниот капиталистички контекст. Целта на изложбата е низ анализа на конкретни уметнички практики, да ги истражи етиката, естетиката и политиката на љубов како радикализам.

Ретроспективна изложба „Вода/Ѕид“ на Јован Шумковски го прикажува делото на еден од најзначајните и највлијателни македонски уметници, чија што речиси четири децениска уметничка практика ја дефинира постојан истражувачки интерес и смела инвентивност во формирањето и изразувањето на неговата ликовна мисла и поглед на светот и времето што го живееме. Сликар по вокација, Шумковски својот авторски пат го бара во континуираното иновирање на визуелниот јазик, кој опфаќа различни медиуми, какви што се сликарството, скулптурата, инсталацијата, видеото, фотографијата.

Постојано подготвен да експериментира со најразлични продуцирани и најдени предмети, материјали и техники (дрвени отпадоци, пигменти, песок, метал, делови од отфрлен мебел, епоксидни смоли, полиестер, бетон, секојдневни предмети, фотографии и др.), ликовниот дискурс на Шумковски е во процес на континуиран и извонредно конзистентен развој. Како што често самиот сака да каже, тој никогаш не започнува со реализација на некое дело или проект доколку во него не може да види никулец и перспектива за неколку идни проекти. Куратор на поставката е Зоран Петровски, а проектот е поддржан од Министерството за култура на РСМ. Двете изложби, со почитување на пропишаните протоколи, ќе може да се посетат до 28 февруари 2021 година.

(Текстот е објавен во „Културен печат“ број 61, во печатеното издание на „Слободен печат“ на 19-20 декември 2020)