Академскиот скулптор Андреј Митевски со самостојна изложба во КИЦ од први до 14 октомври се претставува со дваесетина дела создадени во период од шест години. Изложбата претставува своевиден омаж на неговата инспирација и трагања по форми што го прикажуваат неговиот внатрешен свет. Покрај самостојните, има учествувано на многу групни изложби и интернационални симпозиуми за скулптура.

Делата што ги создал се резултат на инспирацијата, посветеноста, но и на секогаш присутната мотивација од светот што го опкружува. Роден во Скопје во 1976 година, Митевски дипломираше на Факултетот за ликовни уметности во Скопје во 1999 година, во класата на професорот Драган Попоски – Дада, а магистрираше на тема од областа на скулптурата во 2002 година.

Според Митевски, каменот како материјал има своја историја и своја меморија. Носи свои емоции, своја структура и како таков го заслужува неговиот респект и мотивација токму во тој материјал да се изразува, да ги преточи своите мисли и емоции во форма.

(Текстот е објавен во „Културен печат“ број 51, во печатеното издание на „Слободен печат“ на 3-4 октомври 2020)