Изложба со фотографии, костими и плакати со наслов „Монодрамите и дуо драмите на МНТ“ е поставена во фоајето на Македонскиот народен театар. На репертоарот на МНТ низ годините, почнувајќи од 1974 година и „Дневникот на лудиот“ со Владимир Светиев сѐ до најновите „Последната лента на Крап“ на Ѓорѓи Јолевски и „Само глас“ со Звездана Ангеловска и Никола Ристановски, реализирани се 20-ина монодрами и дуо драми.

Во фокусот на изложбата е прикажан актерот кој е сам на сцената или со уште еден актер, борбите кои ги водат сами со себе или со другиот, како и впечатокот кој го оставаат кај гледачот.

Изложбата може да ја види публиката што присуствува на тековните претстави на репертоарот на МНТ, но може да се види и онлајн, на Фејсбук и веб-страницата на театарот.

(Текстот е објавен во „Културен печат“ број 85, во печатеното издание на „Слободен печат“ на 18-20 јуни 2021)