Изложба: Документарни фотоистражувања на пеливанските натпревари од Зоран Шекеров
Во студиото „Прајват принт“ (Private Print) е поставена изложбата „Folded“ на младиот фотограф Зоран Шекеров. Изложбата е отворена на 17 февруари и до 9 април 2021 година ќе може да се посети во средите и петоците во периодот од 12 до 18 часот во студиото.
Изложбата се надоврзува на истоимениот истражувачки документарен проект на Шекеров срочен во фотокнига, издание на „Прајват принт“. Зоран Шекеров (1992) работел на проектот „Folded“ околу две години. Во тоа време тој од близу фотографирал повеќе пеливански натпревари. Притоа воспоставил и блиска комуникација со неколкумина од борачите, така градејќи доверба со нив и, потоа, вградувајќи ја таа доверба директно во фотографиите. Токму тој негов сензибилитет при пристапувањето на темата со која работи го одликува и го издвојува како фотограф.
Неговата практика е насочена кон долгорочни документарни истражувања, коишто ја проучуваат човековата состојба во одреден социо-политички контекст, допирајќи ги и темите на идентитетот. Со фотографиите тој ги преиспитува термините како патриотизам и носталгија, имајќи ја на ум врската помеѓу живата историја и сентименталноста.
(Текстот е објавен во „Културен печат“ број 69, во печатеното издание на „Слободен печат“ на 20-21 февруари 2021)