На полската националистичка влада ѝ е изгласана доверба, со што ќе ја зајакне власта и кампањата против својот сојузник, актуелниот претседател Анджеј Дуда на претстојните претседателски избори.

Првиот круг од изборите ќе се одржи на 28 јуни. Изборите првично беа планирани за 10 мај, но се одложени поради епидемијата од коронавирус.

Премиерот Матеуш Моравиецки неочекувано денеска побара од парламентото гласање за доверба на владата, во обид пред изборите да ја зајакне позицијата на својата националистичка партија Право и правда (ПиС).

„Ако имате доволно гласови, сменете не. Ако не, пуштете не да работиме, не ни пречете“, рече Моравиецки пред гласањето во долниот дом на парламентот, каде неговата владеачка коалиција има мнозинство.

Дуда, сојузникот на владеачките националисти, долго беше убедлив фаворит. Последните анкети покажуваа дека неговото водство се намалува, посебно откако  главната опозициска партија на десниот центар Граѓанската платформа (ПО) го смени својот кандидат, истакнувајќи го либералниот градоначалник на Варшава, Рафал Трзасковски.

Една анкета чии резултати беа објавени во понеделникот покажа дека Дуда би можел да изгуби во вториот круг или од Трзасковски или од другиот главен противкандидат, телевизискиот водител Зимон Холовни.

Аналитичарите објаснуваат дека ПиС сака да му помогне на претседателот на кој се одразија проблемите со имиџот на партијата.

Политикологот Рафал Чведорук смета дека партијата сака да покаже дека владејачкото мнозинство е стабилно.

Реизборот на Дуда е важен за владејачката партија за да може да ја спроведе конзервативната програма, која вклучува реформа во правосудството за која критичарите сметаат дека ќе ја поткопа независноста на судовите.