Романот „Смоква“ од словенечкиот автор Горан Војновиќ е новата книга од работилницата на издавачката куќа „Или-Или“. Станува збор за 182. издание во едицијата „ПРОаЗА“, преводот од словенечки јазик е на Давор Стојановски, а дизајнот на корицата на Марија Смилевска.

По „Југославија, моја дежела“, ова е втор превод на роман од младиот и наградуван писател во издание на „Или- Или“. Излегувањето на „Смоква“ финансиски е помогнато од Јавната агенција за книга на Р Словенија и од Министерството за култура на РСМ.

– „Смоква“ е досега најкомплексниот и најзрел роман на Војновиќ, значително поинтимен, фокусиран на судбината на три генерации од едно семејство, битно обележан со некогашната заедничка држава и со нејзиниот распад. Романот врие од силни, но прикриени емоции, а од сочниот и презреан медитерански плод, кој пука по шевовите, капе семејната сага во која се преплетуваат судбини, љубови, неостварени желби и сурови реалности од нашите животи – потенцираат од „Или-Или“.

Горан Војновиќ (1980, Љубљана) е словенечки режисер, писател и колумнист. Автор е на романите: „Јужњаци, марш!“ (2008), „Југославија, моја дежела“ (2012) и „Смоква“ (2016).

(Текстот е објавен во „Културен печат“ број 28, во печатеното издание на „Слободен печат“ на 25-26 април 2020)