Откако поради пандемијата изборите од 26 април се откажаа, денеска во Србија се одржуваат парламентарни, покраински и локални избори.

Утрово во 7 часот се отворени гласачките места, а своето гласачко право ќе можат да го искористат 6.583.665 граѓани на 8.386 гласачки места, меѓу кои и на 90 места во Косово и во 42 амбасади на Србија.

Граѓаните на Србија ќе бираат пратеници за Националното собрание, во кое има 250 пратенички места. Истиот ден, граѓаните на Автономната покраина Војводина ќе избираат и 120 пратеници на Покраинското собрание, а ќе се гласа и за локалните собранија во градовите и општините на Србија.

На парламентарните избори за доверба на 6.583.665 гласачи оваа година ќе се натпреваруваат 21 избирачна листа на партии и коалиции, кои ќе се борат да го поминат прагот од три проценти и да освојат места во српскиот парламент. Дел од опозицијата ги бојкотира изборите.

Поради коронавирусот, Републичката изборна комисија (РИК), најави дека за денешниот ден на избирачките одбори ќе им обезбеди маски и ракавици, додека гласачите немаат обврска да носат заштитна опрема кога одат на гласање.

Фаворит на изборите е Српската напредна странка (СНС) на претседателот Александар Вуќиќ, но поголемиот дел од опозицијата собрана околу коалицијата Сојуз за Србија (СзС) се реши на бојкот бидејќи сметаат дека нема услови за фер и демократски избори.