ИЗБОРИ ВО БОЛИВИЈА: Моралес уверен во победа, Месa најавува втор круг
Претседателот на Боливија, Ево Моралес, изјави дека е уверен оти ќе победи на изборите одржани вчера, и покрај тоа што по 84 отсто од избројаните гласови, најверојатно ќе се одржи втор круг на гласање во земјата.
Моралес (59) рече дека сигурните гласови од руралните подрачја, каде има посила поддршка, ќе му донесат уште една „историска победа“ и мнозинство во Конгресот.
Како што пренесува „Ројтерс“, на Моралес му се потребни најмалку 40 отсто од гласовите и предност од 10 поени пред неговиот главен ривал за да се избегне втор круг на гласање на 15 декември.
Досегашното броење покажува дека Моралес освоил 45 отсто од гласовите, додека 38 отсто има неговиот ривал Карлос Месa, кој веќе го прослави пласманот во вториот изборен круг.