ИВЗ доби сопственост над зградата на Албанскиот театар за деца и млади, директорката не знае
Исламската верска заедница ја презела сопственоста врз зградата на Албанскиот театар за деца и млади во Старата скопска чаршија, а тоа е веќе впишано и во Катастарот, објави Алсат.
Образложението за промената на сопственоста на објектот на театарот, кој е национална установа под закрила на Министерството за култура, е дека објектот бил вакаф, односно верски посед на ИВЗ. Промената на сопственоста ја потврдуваат и од верската заедница, откаде велат дека тој е даден во владение на скопското муфтиство. Според нив, театарот нема потреба да го напушта објектот додека не најде нов простор.
Надлежните велат дека не се запознаени со новиот развој на настанити. Директорката на НУ Албански театар за деца и млади, Дијана Тоска, вели дека нема што да каже додека не добие официјално соопштение. Ист став за Алсат изнеле и од Министерството за култура. Заменик-министерот, Седат Сулејмани, вели дека ќе се распраша за случајот и ќе ја извести јавноста, но не понуди повеќе информации.
Неофицијално се споменува решение со кое на Театарот за деца и млади ќе му биде понуден дел од Албанскиот народен театар во Скопје, но актерите се противат на ова, пишува Алсат. Инаку, Владата со буџетот за годинава додели средства за реновирање на објектот во Чаршијата, поточно подрумот на детскиот театар и негово прилагодување во работни простории.