Ивент компаниите в понеделник на собир ќе побараат од Владата да изнајде начин и да им помогне

Под мотото „ПОМЕН – една година тишина!”, по повод точно една година од забраната за одржување на јавни настани, заради Ковид пандемијата, в понеделник точно на пладне во организација на Асоцијацијата на ивент индустријата – ИВАП ќе се одржи собир пред Владата на кој ивент компаниите ќе побараат од Владата да изнајде начин да им помогне.

– Со овој собир сакаме да го свртиме вниманието на Владата, но и на јавноста за состојбата во нашата дејност која навистина е голем губитник од пандемијата. За жал, ние како дејност немаме никаква помош од страна на нашата држава. Ниту сме препознаени и разбрани како сектор, а без помош и поддршка не е возможно да опстанеме после цела година неработење, велат од ИВАП.

Деновиве, додаваат, сме сведоци на зголемен број заболени, што сериозно нѐ загрижува, бидејќи тоа значи дека уште долго нема да можеме да отпочнеме со работа.

– Како одговорни граѓани и компании, сметаме дека е неумесно да бараме да одржуваме јавни настани при ваква состојба. Ние не правиме тајни настани, не ги прекршуваме законите и прописите и не ѝ создаваме проблеми на пазарната инспекција. Затоа, сметаме дека немаме друг избор освен Владата да изнајде начин и да му помогне на овој сектор, порачуваат од ИВАП.

Потсетуваат дека во последниот пакет мерки Владата објави дека се наменети средства за секторот за организација на настани, но, посочуваат, моделот кој го предложи ниту некому му е јасен, ниту, пак, има најава кога би можеле да се надеваме на реализација.

– Ние понудивме неколку модели за помош, но ниту еден од нив не бил земен пред вид и понуден е целосно нов, нејасен модел без рокови и јасни правила што остава простор за сомнеж во неговата правичност и намена, потенцираат од ИВАП.

За жал, нагласуваат, изведувачките уметности, музиката и јавните настани се вториот најголем губитник од ковид пандемијата во Европа и светот.

– Според последното истражување на европската агенција EY Consulting, тие се веднаш зад авио транспортот и според истражувањата, закрепнувањето на оваа важна општествена гранка мора да биде сериозно поддржано и помогнато од локалните влади, истакнуваат од ИВАП.

Почитуван читателу,

Нашиот пристап до веб содржините е бесплатен, затоа што веруваме во еднаквост при информирањето, без оглед дали некој може да плати или не. Затоа, за да продолжиме со нашата работа, бараме поддршка од нашата заедница на читатели со финансиско поддржување на Слободен печат. Станете член на Слободен печат за да ги помогнете капацитетите кои ќе ни овозможат долгорочна и квалитетна испорака на информации и ЗАЕДНО да обезбедиме слободен и независен глас кој ќе биде СЕКОГАШ НА СТРАНАТА НА НАРОДОТ.

ПОДДРЖЕТЕ ГО СЛОБОДЕН ПЕЧАТ.
СО ПОЧЕТНА СУМА ОД 60 ДЕНАРИ

Видео на денот