Италијанската кујна е широко популарна по многубројните видови тестенини, пици, вкусни брускети и секако квалитетните сирења и кашкавали.

Во различни региони во Италија можат да се пробаат разни видови сирења и кашкавали, кои се подготвуваат на карактеристичен начин и можат да се комбинираат со различни производи. Тие по својата конзистенција и траење на зреењето се делат во три основни групи, а тоа се тврди, полутврди и меки. Интересно е и тоа што кај нив сите овие млечни преработки се под едно име – сирења, додека кај нас се разликуваат сирења и кашкавали.

Тврди се оние чиј период на зреење трае повеќе од половина година, тие најчесто можат да се консумираат рендани. Полутврди се оние чиј период на зреење е до три месеци, а меките брзо зреат и се јадат свежи.

Еве кои се најпопуларните италијански кашкавали и сирења, кои задолжително мора да ги пробате:

Пармезан – секако дека мора да почнеме со најпопуларниот и познат „пармиџано реџано“ или едноставно наречен „пармезан“. Овој кашкавал се додава во јадењата, може да се стави на различни видови пица, сосови за тестенини и др.

Моцарела е следниот млечен производ што заслужува внимание. Тоа е свежо сирење со густа структура, често се сервира во салати. Моцарелата често се користи и како додаток на пици и тестенини.

Рикота е сирење кое се прави од овча сурутка или сурутка од кравјо млеко и има сладникав вкус и мазна конзистенција. Ако сакате да ја послужите дома, најдобро друштво на ова сирење му прави вино со овошна арома.

Маскарпоне е исто многу популарно италијанско сирење, кое има густа кремава структура. Ова сирење најчесто се комбинира со шумско овошје, смокви, а е незаменлив дел во тирамису десертот. Добро е во комбинација со шардоне и шампањско. Поради слаткиот вкус маскарпонето може да се комбинира со кафе или со некој ликер.

Пекорино е овчи кашкавал, кој потекнува од Тоскана и има специфична арома и вкус. Тој има тврда конзистенција и одличен е во комбинација со црвени вина.

Горгонзола е сино сирење со кремаста структура и за него е карактеристично тоа колку е понезрело, има поблаг вкус.

Грана падано е италијански кашкавал со тврда конзистенција, благо пикантен, солен вкус со нежни нијанси на јаткасти плодови.

Проволоне е полутврд кашкавал што може да се чува со месеци. Колку подолго стои, има поизразен вкус.

Качокавало е следниот италијански десерт што мора да го пробате ако имате можност. Тој е гордост на Сицилија и на јужниот регион Базилика. Може да се прави од кравјо млеко и мешавина од кравјо, овчо и козјо млеко.

Талеџио е уникатен италијански кашкавал, кој ќе ве освои со својот вкус. Се приготвува од полномасно кравјо млеко и се одликува со портокалова коричка и мека внатрешност.