Италија: Се враќаат на работа докторите и сестрите суспендирани зашто не сакаа да се вакцинираат
Италијанските лекари и медицински сестри суспендирани затоа што не биле вакцинирани против ковид-19 наскоро ќе бидат вратени на работа, изјави денеска новиот министер за здравство, Орацио Скилачи.
Причината за потегот на властите е алармантниот недостиг на медицински персонал и намалувањето на случаи на заразени со коронавирус. Новата влада, исто така, ќе ги укине ограничувањата со кои се соочуваа луѓето постари од 50 години кои не се вакцинирале, рече Скилачи во соопштението објавено на веб-страницата на Министерството.
Владата на претходниот премиер Марио Драги ја направи вакцинацијата задолжителна за наставниците и здравствените работници во 2021 година, а во јануари оваа година го прошири условот за сите луѓе на возраст од над 50 години. Во случај на одбивање на вакцинација, предвидена беше суспензија за вработените во јавниот сектор и глоба од 100 евра за луѓето постари од 50 години.
Во соопштението на веб-страницата на Министерството за здравство се вели дека Скилачи смета дека е соодветно да се врати ситуацијата во нормала и најави дека запира објавувањето дневни податоци за ширењето на коронавирусот, хоспитализациите и смртните случаи. Информациите сега ќе се објавуваат на неделно ниво.