Италија менува боја на мапата на ризик од ковид-19: Поголем дел од земјата од недела во портокалово
Италијанскиот министер за здравство Роберто Сперанца денеска треба да потпише указ со кој поголем дел од државата ќе се најде во портокалова боја на ризик од инфекција со вирусот ковид-19, а полицискиот час од 22 до 5 часот наутро останува во сила.
Со црвена боја ќе остане Ломбардија, регионот што беше најпогоден од првиот бран на вирусот, Сицилија и провинцијата Болзано.
Тие правила ќе стапат на сила в недела, а одлуката на Сперанца се заснова на најновите податоци на Министерството и на Институтот за јавно здравје. Новата регулатива предвидува и забрана за патување меѓу региони, освен од деловни и здравствени причини, како и неопходни ситуации, а забраната ќе остане на сила до 15 февруари.
Зонскиот систем значи дека во најризичната, црвена, зона, сите ресторани и барови ќе бидат затворени, освен оние што доставуваат храна, а сите продавници што продаваат непрехранбени производи ќе бидат затворени.
Во портокаловата зона, која се смета за зона со среден ризик, продавниците можат да работат, но баровите и рестораните се затворени. Во умерената, жолта, зона, баровите и рестораните можат да бидат отворени до 18 часот по локално време.