Истрага во Германија: Доктор вбризгал смртоносни инјекции на двајца пациенти со тежок облик на ковид-19
Германската полиција соопшти дека отворила истрага против доктор во Есен за убиство на двајца тешко болни пациенти од ковид-19, објавија властите.
Доктор на возраст од 44 години кој од февруари работел во Универзитетската болница во Есен е осомничен дека убил двајца мажи на возраст од 47, односно 50 години кои лежеле на интензивна нега, а биле инфицирани со коронавирус и имале тежок облик на болеста.
Тамошната полиција истакна оти докторот признал за едно убиство, велејќи оти сакал да го поштеди пациентот и неговите роднини од натамошни страдања.
„Билд“ јавува дека докторот ги известил роднините на пациентите пред да им вбризга смртоносна инјекција.
Болните во Германија може да побараат помош во врска со завршување на сопствените животи врз основа на пресуда што беше донесена во минатата година, но сè уште е нејасно дали се случило тоа и во овој случај.
Болницата во Есен соопшти дека докторот е суспендиран и се наоѓа на распит во полиција.