Исламската заедница на Косово ги суспендира молитвите и другите манифестации во џамиите поради коронавирусот
Исламската заедница на Косово (БИК) објави денеска дека, поради опасноста од ширење на коронавирусот, времено се суспендираат дневните молитвени собири со ритуали на клањање и другите верски обреди во џамиите низ земјата, јави дописникот на МИА од Приштина.
Во соопштението што во попладнево го објави БИК, се вели дека „верска обврска е стриктното почитувањето на сите одлуки, мерки и препораки произлезени од надлежните институции на Република Косово во спречувањето на ширењето на вирусот Ковид-19“.
БИК им препорачува на муслиманите верските обреди да ги вршат во своите домови, без да се мешаат во групи со други верници.
– Се одлага наставниот процес во сите наши образовно-верски институции, верската настава во сите џамии и медреси, како и работата во сите ученички домови на Исламската заедница на Косово. (…) Се наложува дезинфекција на сите образовни објекти, на административните објекти на ИЗК, како и на верските објекти. Привремено се одлага организирањето на предавања, трибини, семинари и разни средби со верниците – се вели, меѓу другото во објавата на БИК.
Организацијата на косовските муслимански верници исто така препорачува да се откажуваат традиционалните изразувања на сочувство во смртни случаи, верските и семејни церемонии, како што се сунетот, мевљудите, венчавките и свадбите, како и погребните церемонии да се организираат во што потесен круг на членовите на семејствата.
Исламската заедница ги охрабрува верниците да водат повеќе сметка за хигиената, почитувајќи ги верските принципи и препораките на надлежните институции и ги потсетува дека „ширењето дезинформации, кои предизвикуваат вознемиреност и непотрбна паника кај граѓаните, како и кревањето на цените на прехрамбените намирници и на лековите во кризни времиња, се забранети од верата“.