Исчистени, па оградени неколку диви депонии во Скопје

Дивите депонии низ Скопје во изминатиот период забрзано се чистат, а за да не дојде до повторно натрупување ѓубре на исчистениот простор, дел од нив се заштитуваат со поставување заштитни столпчиња и огради.

На терен работат екипите на ЈП „Улици и патишта“, од каде објаснуваат дека акцијата се спроведува со цел да се се отстранат дивите депонии кои се извор на зарази и воедно влијаат на аерозагадувањето, па затоа, како што тврдат оттаму, со ваквите активности ќе се продолжи и во наредниот период.
Досега се исчистени повеќе диви ѓубришта, како што е депонијата на улицата Марк Твен во Карпош, која е заштитена со ограда за да се спречи пристапот и повторното создавање на депонија. Во општина Кисела Вода исчистени се дивата депонија во населбата Припор и кај „Теферич”, како и депонијата на патот од населба Драчево кон село Батинци.

– Депонијата во насока од село Јурумлери кон Лисиче е исчистена, а се чисти и депонијата под Транспортен Центар на булевар АСНОМ спроти Ист Гејт Мол. Исчистена е и депонијата во општина Бутел на крстосницата со улица Боца Иванова и со улица Александар Урдаревски. Исчистени се и депониите покрај Усјански канал во Горно Лисиче, кај гробишта Бутел на паркингот, на крајот од булевар Илинден кон Карпош и депонијата кај гробишта Камник – велат од ЈП „Улици и патишта“.

Градоначалничката Данела Арсовска уште во предизборната кампања најави дека во првите 82 дена од нејзиниот мандат ќе се исчистат сите диви депонии во Скопје, а од Градот на крајот од декември се пофалија дека веќе се исчистени 120 депонии.

– Уште во првите денови од својот мандат градската администрација почна интензивно да ги чисти сите диви депонии кои беа детектирани на територијата на Град Скопје и досега се исчистени над 120 депонии. На дел од нив се планирани нови зелени површини, а меѓу нив во Ново Лисиче, во Ново Село и на многу други места – информираа од Град Скопје на крајот на минатата година.

Видео на денот