Ирански товарен брод со контејнери што пловел во Средоземното Море бил оштетен во напад оваа недела, соопшти ирански официјален претставник, нарекувајќи го инцидентот „терористички акт”. Бродот е лесно оштетен од експлозивна направа, но никој од него не е повреден, изјави Али Гиаси, портпарол на државната шпедиција ИРИСЛ. Наводниот напад се случил во средата.

– Таквите терористички акти претставуваат поморско пиратство, додаде тој, без да даде повеќе детали.

Обвинението доаѓа еден ден откако „Волстрит журнал” објави дека Израел нападнал најмалку 12 брода кои пловеле кон Сирија, од кои повеќето превезувале иранска нафта, со мини и друго оружје.

Нападите започнаа кон крајот на 2019 година и беа насочени кон ирански бродови и други ирански товарни бродови, се вели во текстот, повикувајќи се на „американски и регионални претставници”.

Некои од израелските напади во Црвеното Море и други области се насочени против снабдувањето со оружје за Иран, се вели во извештајот.

Нападите не ги потопиле танкерите, но принудиле најмалку два од бродовите да се вратат на пристаниште во Иран.

Израел се обидува да ја запре трговијата со нафта затоа што верува дека со профитот се финансираат регионални екстремисти, објави „Волстрит журнал”.