Младиот пејач Стефан Спироски од Струга веќе подолго време се занимава со музика, а од својата најмала возраст има снимено неколку преработки и свои авторски песни.

Стефан настапи на 31. издание на „Охрид фест“ со песната „Љубов моја“, со која ја освои наградата за најдобра поп-песна на фестивалот.

Кога почна да се занимаваш со музика и како откри дека имаш талент?

– Со музика се занимавам од мојата најмала возраст, а талентот го открија моите родители. Подоцна почнав да настапувам на повеќе интернационални фестивали во Македонија и да пеам во регионот, каде што уште еднаш се потврди мојот талент, не само од изградени музичари, туку воопшто и со наградите што ги добивав, тоа беше потврда за мојот талент.

Освои награда за најдобра поп-песна на фестивалот во Охрид. Што значи за тебе оваа награда и со кого соработуваше за песната?

– Оваа награда за мене значи само еден добар почеток што ми дава ветар во грб за да продолжам понатаму да работам со музика. Соработував со едни од најдобрите во Македонија, а тоа се: Григор Копров, кој ја напиша мелодијата за песната „Љубов моја‘, Огнен Неделковски, кој го напиша текстот за песната, и Димче Китрозоски, кој го направи аранжманот. Сè на сè, излезе одлична нумера, за која добив и награда што особено ми значи.

Во најава е песната да излезе и на хрватски јазик, а текстот е на Антонија Шола. Како дојде до оваа соработка, зошто на хрватски и дали се познавате со Шола?

– Да, во скоро време песната ќе излезе и на хрватски јазик, што особено е мој голем предизвик. Антонија ја познавам веќе пет години и одлично соработуваме, па затоа решив сите песни што ќе ги снимам на македонски да ги снимам и на хрватски јазик и верувам дека ќе ѝ се допаднат на публиката.

Тешко ли е да се наметнеш на домашната сцена?

– Секако дека е тешко, но затоа се трудиме со квалитет да оставиме белег во македонската музика. Освен квалитетната музика, важна е и соработката со медиумите, кои секако се од големо значење за да можеш и да опстанеш на сцената и да се наметнеш како музичар.

Роден си во Струга, што најмногу сакаш во твојот град?

– Да, роден сум во Струга. Со гордост за себе велам – стружанец. Струга важи за најубавиот град, затоа што е уникатен спој на природни убавини.

Освен музиката, што друго е интересно за тебе и твојот приватен живот?

– Покрај музиката, јас исто така сум професионален готвач и работам веќе 12 години. Го сакам тоа што го работам, уживам готвејќи различни специјалитети и деликатеси, но покрај готвењето, музиката е она што ме прави среќен и ме исполнува.

Освен настапот на „Охрид фест“, кои се твоите идни планови?

– Веќе работам на други три авторски песни, од кои едната е завршена и наскоро треба да го снимам спотот. Аранжманот и музиката се на нашиот Кире Костов и воедно тоа е последната песна што ја напиша во својата кариера пред да почине, а автор на таа песна е Огнен Неделковски.

Сметаш ли дека од музиката може да се живее кај нас?

– Ретко кој живее од музика во нашата држава, ама затоа пак јас живеам за музиката.