ИНТЕРВЈУ Јована Кипријановска: Европското првенство е многу важно за женскиот ракомет во Македонија

јована кипријановска
Јована Кипријановска, ракометарката на ЖРК Куманово/Фото: Кочо Сотировски/24 Ракомет

– Ракометот е еден од најразвиените спортови во Македонија, но за жал во женскиот ракомет има поголем пад отколку подобрување за разлика од минатото – вели ракометарката на ЖРК Куманово, Кипријановска.

Јована Кипријановска игра со срце на теренот, со огромна желба и волја, а тоа веќе го докажува на терените. Десниот бек блеска на натпреварите со нејзините игри и погодоци, воедно придонесува за одличните резултати на нејзиниот клуб Куманово кој моментно е на првото место во нашата најквалитетна женска ракометна лига со 14 победи од 14 натпревари.

На последниот лигашки дуел Кипријановска забележа 12 голови во триумфот над Феникс АМС и екипата најавува сериозни амбиции во трката за титулата, иако има уште доста да се игра.

Воедно Кипријановска ги брани боите на најдобрата македонска репрезентација и се радува на настанот кој сите со нетрпение го очекуваме, а тоа е Европското сениорско првенство кое ќе се одржи во три земји, Македонија, Словенија и Црна Гора во периодот од 4 до 20 ноември 2022 година.

Кога почнавте да тренирате ракомет и што ве инспирираше да бидете дел од овој спорт?

– Со ракометот започнав на 12 години. Таа година почнаа да се пријавуваат мали девојчиња на ракомет и татко ми ми предложи да пробам бидејќи тој има тренирано како млад. Уште од првиот тренинг ми се допадна спортот и тимската игра.

На клупски план сезонава ги браните боите на Женскиот ракометен клуб Куманово, колку сте задоволни од настапите, секако тимски и индивидуално, и дали има простор за напредок во играта?

– Целата моја ракометна приказна досега е во ЖРК Куманово. Од сите години можам да кажам дека сум многу задоволна, секоја година клубот гледа да ни пружи најдобри услови за тренирање, ние работиме најдобро што можеме и мислам дека резултатите сами си доаѓаат на крајот. Оваа година сме помлада екипа, но тренираме напорно и мислам дека прикажавме добра игра во последните натпревари. Има многу простор за напредок затоа што сите сме млади и гледаме да бидеме се подобри и подобри, се надополнуваме една со друга и имаме доста натпревари за да собираме искуство за понатаму.

јована кипријановска
Кипријановска со женскиот ракометен клуб на Куманово реди победи во првенството/Фото: Кочо Сотировски/24 Ракомет

Оваа година, заедно со Црна Гора и Словенија ќе бидеме домаќини на Европското првенство. Што значи за нас како земја овој предизвик, сигурно би била убава можност за промоција на женскиот ракомет во Македонија?

– За нас овој настап има преголемо значење бидејќи најпрво Македонија после многу години ќе биде на Европско првенство и тоа е многу важно за развивање на женскиот ракомет во Македонија. Репрезентацијата е подмладена и за сите ракометарки оваа е многу значаен настан за напредување и стекнување на искуство кое ќе им користи на сите за понатамошните достигнувања.

Велат дека ракометот е спорт број 1 во Македонија. Дали тоа според вас се чувствува од секаков аспект, покрај добрите резултати во минатото или верувате дека треба и во иднина да се вложува доста во развојот на ракометот во машка и женска конкуренција, започнувајки од основните услови како тренинзите?

– Ракометот е еден од најразвиените спортови во Македонија, но за жал во женскиот ракомет има поголем пад отколку подобрување за разлика од минатото. Сите ние би сакале да можеме да останеме дома и да тренираме во врвни услови и да играме добра лига во која можеме да напредуваме, но за жал денеска доколку сакаш да продолжиш како професионален играч тогаш тоа е многу тешко со условите кои ги има тука. Сите поголеми клубови се трудат да направат услови, но тоа не е доволно и не може да се спореди со другите земји каде ракометот е на многу повисоко ниво.

јована кипријановска
Кипријановска ги брани боите на македонската женска сениорска репрезентација/Фото: Кочо Сотировски/24 Ракомет

Како изгледа еден ваш обичен ден, покрај обврските во ракометот?

– Скоро секој ден ми е исполнет со ракометни обрски, наутро имам теретана, потоа одмарам и се спремам за наредниот вечерен тимски тренинг, а кога немам обврски со ракометот гледам да се одморам, да поминам време со најблиските и да одвојам време за факултетот.

Кој е вашиот спортски идол и зошто?

– Има повеќе играчи кои ги гледам како Кристина Неагу, Ана Грос, Анна Вјакхирева и некои други, и од сите нив гледам да го земам најдоброто од играта и професионалниот спортски живот.

Што сакате да ви се оствари во 2022 година, кои се вашите искрени желби?

– Најпрво сакам да останам здрава и сите околу мене исто така, желба ми е да напредувам и да ги остварам највисоките цели на репрезентативен и клупски план.

Што треба да го краси еден ракометар, спортист за да може да верува во успех, во добар резултат?

– Најпрвин да го сака спортот, да биде упорен и истраен, да не се возвишува, да има големи амбиции и 100% да се вложува.

Видео на денот