Иако пандемијата на коронавирусот ги стави најголемите фудбалски екипи во „црвено“, се чини дека за Интер нема да има никакви проблеми бидејќи сопствениците „Сунинг компанија“ според информациите од Кина, од пандемијата излегла уште побогата.

Тие продолжуваат со своите планови, Интер да го симне Јувентус од тронот на италијанскиот фудбал иако не успеаја во оваа сезона. „Нероаѕурите“ признаваат дека тимот од Торино е далеку пред нив сезонава, и затоа имаат големи планови за летниот преоден рок.

Тренерот Антонио Конте бараше и ветено му е дека ќе добие пет засилувања со кои планираат да ја прекинат доминацијата на Јувентус.

Првото име кое треба да пристигне на „Џузепе Меаца“ е Жоан Кансело кој веќе има настапувано за Интер. Барселона се договори со Интер, прво Нелсон Семедо да го испрати во Манчестер сити во замена за Кансело кој потоа со одредена сума на пари би бил испратен во Интер во замена за Лаутаро Мартинез.

Празнината во нападот која ќе остане по заминувањето на Лаутаро треба да ја надополни Единсон Кавани на кого ова лето му истекува договорот со ПСЖ. Интер веќе му понуди тригодишен договор на Кавани кој се очекува да ја прифати понудата.

Директорот Бепе Марота уште сега започна да работи на трансферот на Киеза од Фиорентина која не попушта и бара 60 милиони евра. На крајот Интер ќе мора да ја плати бараната сума.

Конте во средниот ред за новата сезона сака да го има Артуро Видал, но Чилеанецот не е приоритет. Доколку не се договори со Барселона, Конте е подготвен да му даде уште една шанса на Раџа Наинголан кој оваа сезона настапува за Калјари како позајмен фудбалер.

Тренерот Конте бара од Марота и освежување на одбраната, тој сака еден од своите поранешни играчи, Маркос Алонсо или Емерсон Палмиери кои настапуваат за Челси.

Интер со Емерсон, Кансело, Видал или Наинголан, Кавани и Киеза, според замислите на Конте е доволно квалитетен да го предизвика Јувентус за титулата во наредната сезона.