Институтот за македонска литература при Универзитетот „Св. Кирил и Методиј“ во Скопје со дводневна меѓународна научна конференција што се одржа на 29 и 30 јуни на тема „Македонска книжевна архива: од ракопис до дигитална култура“ одбележа 40 години од своето основање и 100 години од раѓањето на Блаже Конески.

На пригодната свеченост во Куршумли-ан на 29 јуни присуствуваа видни гости, меѓу кои беа претседателот Стево Пендаровски, Ректорот на УКИМ – Никола Јанкуловски, заменик-министерот при МОН, Арафат Шабани, амбасадорот на Република Словачка Н.Е. Хенрик Маркуш, раководители и претставници на повеќе научни и културни установи, како и вработените и студентите на Институтот. Во своето поздравно обраќање претседателот Пендаровски ги акцентираше двата јубилеи – 40 години од основањето на Институтот и 100 години од раѓањето на Блаже Конески, додека преку богатата програма на конференцијата го посочи значењето и местото на Институтот за македонска литература во нашето општество.

– Да се има грижа кон книжевното културно наследство, да се негува меморијата за континуитетот на мислењето обликувано низ книжевните форми и записи, значи да се архивира секоја социо-културна специфика на едно национално милје, но, пред сѐ, значи да се има посебен однос кон сопствените корени. Многу одамна е јасно дека културите, нивната повеќезначност и слоевитост се рефлектираат низ наративите на книжевните записи кои остануваат релевантни за сите времиња. Богатството на културните идентитети најдобро може да се согледа низ мноштвото книжевни артикулации во светот, а низ тие артикулации се отсликува и развојот на јазичното богатство и наследство. Токму затоа не смееме ниту да помислиме да запреме со одговорното архивирање, но и со постојаното научно, креативно и критичко промислување на контекстите во кои е создавано книжевното културно наследство. Ако тој процес запре, бездруго ќе запре и идејата за творење како културен и општествен процес иманентен на луѓето – истакна претседателот Пендаровски.

Присутните гости ги поздрави директорката Маја Јакимовска-Тошиќ, која рече дека обемната програма на научната конференција е круна на активностите на Институтот. Дел од свеченоста беше и промоцијата на монографијата „Етичките и аксиолошките аспекти на литературата и културата на 20 и 21 век“, која беше претставена од Ана Мартиноска.

(Текстот е објавен во „Културен печат“ број 87, во печатеното издание на „Слободен печат“ на 3-4 јули 2021)