Договорот за трансфер на технологија за производство на руската вакцина „Спутник V“ во Србија денес го потпишаа белградскиот институт за вирологија, вакцини и серуми Торлак, рускиот фонд за директни инвестиции и руската фармацевтска компанија „Генеријум“.

Ова го објави министерот Ненад Поповиќ, одговорен за иновации и технолошки развој во српската влада и претседател на Меѓувладиниот комитет за соработка со Русија.

„Овие се чувствителни и доверливи податоци што можат да ги разменуваат само партнери кои имаат голема меѓусебна доверба“, рече Поповиќ во изјавата.

Тој најави дека овој месец ќе се произведат „три серии за валидација“ на вакцината „Спутник V“ во Институтот „Торлак“, а примероците ќе бидат испратени за контрола на квалитетот до институтот „Гамалеја“ во Москва.

Откако рускиот институт ја потврди „валидноста на примероците“, Институтот Торлак ќе започне со производство на вакцината.

„Очекуваме тоа да се случи до 20 мај годинава“, рече Поповиќ.

Тој рече дека Србија на тој начин ќе стане првата земја во Европа што ќе произведува вакцина „Спутник V“, покрај Русија, и дека тоа ќе биде „историски момент за Србија“.

Извор: Бета