ИНИЦИЈАТИВА: Ќе прерасне ли руинираниот објект во Ченто во културен простор?
Културно-едукативен настан чија цел беше да се поведе иницијатива за обнова на напуштениот Дом на култура во населба Ченто, преку вклучување на локалната власт, граѓанските организации, уметниците и локалните жители, се одржа вчера во населбата Ченто.
Најпрво во руинираниот Дом на културата беше одржана Еко акција за расчистување на внатрешноста на објектот и беше извршено симболично метење на театарската сцена. Потоа во паркот „Методија Андонов Ченто“ се одржа панел-дискусија, на која учесниците дискутираа за тоа како напуштен објект да се претвори во мултифункционален и самоодржлив културно-едукативен простор, надвор од центарот на градот. Потоа присутните граѓани се забавуваа со музиката на неколку диџеи и македонски бендови.
– Населбата Ченто порано имаше прекрасен Дом на културата што го посетуваа илјадници луѓе низ годините. На површина од цели 2.800 метри квадратни, бина од 85 метри квадратни и сала со 328 седишта, овој простор биеше како културно срце на населбата. На огромна штета на илјадници граѓани на Скопје, веќе 25 години Домот на културата е мрачно, руинирано, неупотребливо место – велат од невладината организација „Културно ехо“, која беше организатор на настанот со поддршка на Град Скопје и Општина Гази Баба.
Организаторите сметаат дека по примерот на многу европски метрополи, на Скопје и на другите градови низ Македонија им е потребна стратегија за решавање на сложениот проблем со руинираните објекти, во чии просторни капацитети може да се направи соодветна интервенција и да се оспособат за нова функционална програма, според потребите на граѓаните.
Здружението „Културно eхо“ го организираше овој еднодневен културно-едукативен настан, со цел да поведе иницијатива за обнова на напуштениот Дом на културата во населбата Ченто.