Индијан Велс е само почеток, се откажуваат и турнирите во Мајами, Монте Карло и Рим?
Турнирите од Мастерс серијата во Мајами, Монте Карло и Рим најверојатно ќе бидат откажани поради коронавирусот, пренесува „Марка“.
Организаторите на првиот годинешен Мастерс турнир во Индијан Велс на денот кога требаше да започне турнирот, соопштија дека тој е откажан поради коронавирусот, а оваа одлука се очекува да ја следат организаторите на наредните три Мастерс турнири.
Според шпанскиот весник „Марка“, во Индијан Велс е одржан состанок помеѓу тенисерите и организаторите на Мастерс турнирите, а главна тема се токму претстојните турнири од Мастерс серијата, во Мајами, Монте Карло и Рим.
Во Мајами веќе е откажан фестивалот „Ултра Мјузик“ (25 март), додека Мастерс турнирот е предвидено да се игра од 23 март до 5 април и официјалната одлука се очекува да биде соопштена неделава.
Голема е веројатноста да се откажат и турнирите во Монте Карло и Рим, бидејќи се наоѓаат во двете земји, Франција и Италија, каде има највеќе заболени од коронавирусот. „Марка“ пишува дека засега турнирот од Мастерс серијата во Мадрид (стартот е на 4 мај) нема да се одложи и така ќе остане доколку не се влоши состојбата со бројот на заразените во Шпанија.
Според „Марка“ висат и сите турнири кои треба да се играат во Кина, а Мастерсите во Индијан Велс и во Мајами би се играле во термините на турнирите во Пекинг (5 октомври) и Шангај (12 октомври), односно по одигрување на последниот годинешен грен слем турнир, УС Опен.