Влијателниот новинар, колумнист и есеист Теофил Панчиќ почина на возраст од 60 години, по долга и тешка болест.

Панчиќ со години беше за некои омилен, а за други незгоден колумнист и коментатор во неделникот „Време“ и во весникот „Данас“, наметнувајќи се со препознатливиот остар стил и критички осврти. Тој е автор на дваесетина книги, претежно збирки на есеи, како и на текстови и колумни во многу регионални списанија.

Роден во Скопје во 1965 година, Панчиќ живееше и твореше во Србија, се чувствуваше како Војвоѓанец, а остави белег во целиот регион.

– Заминувањето на Теофил Панчиќ ѝ пркоси на паролата дека нема незаменливи. Со неговата смрт остануваме без единствената појава на широка ерудиција, уникатниот карактер, непогрешливото чувство за праведност и без автор со неповторлив стил – објави весникот „Време“.