Јавноста побудале од премногу најави и празни ветувања, а речиси престана да се надева дека вакцината ќе дојде наскоро. Бидејќи нема здравствена кампања за едукација, постојано се шират теории на заговор, во кои народот верува многу повеќе отколку во вирусот и во вакцината заедно.
Македонците сѐ уште чекаат во земјава да пристигне некоја од најавените 2.641.000 дози вакцини, кои ќе бидат доволни за да се вакцинираат 1.320.500 граѓани. Се прашувате од каде толку вакцини? Толку најави министерот за здравство Венко Филипче, доколку внимателно сте ги слушале неговите изјави. Прво информираше дека 833 илјади вакцини ќе добиеме од КОВАКС-механизмот, потоа дека ќе добиеме уште околу 800 илјади од Полска и од Грција, 800 илјади од „Фајзер“ (директен договор), 8 илјади од Србија и сега најново, уште 200 илјади од Кина. Од декември минатата година само слушаме разни најави за набавка на вакцините, за разни договори и количини, но вакцините никако да стигнат во Македонија. Да го оставиме настрана проблемот што го имаат сите држави во Европа, неисполнетиот договор за достава на вакцини од компанијата „Фајзер“. Но, што чекаа властите досега? Зарем немаа план Б? Зарем „Фајзер“ е единствената компанија која произведе вакцина против ковид-19? Да не зборуваме за тоа што не бевме подготвени за регистрација на вакцините што Србија ги издвои за нас.
Но, не се само бројките во прашање. Имаме и разноразни најави за типот на вакцините што ќе дојдат. Прво беше „Фајзер“, па ќе ја добиевме „Спутник V“ преку КОВАКС-системот (ова во изјава за „Слободен печат“ го потврди и владиниот портпарол), па нема да имаме руска вакцина, ќе имаме само американска, па преговараме со „Астра-Зенека“, па не сакаме кинеска вакцина, ама сега сакаме итн.
Јавноста побудале од најави и празни зборови, а во меѓувреме и престана да се надева дека вакцината ќе дојде во блиско време. Луѓето на улица коментираат: „Каква вакцина, тешко дека ќе ја дочекаме, попрво сите ќе го прележиме вирусов“. Луѓето станаа имуни на вакцините.
А, за тоа говори и податокот од последната анкета на Галуп. Дури 49 отсто од граѓаните се изјасниле дека не би се вакцинирал против ковид-19 дури и доколку вакцината стане јавно достапна и се смета за безбедна и ефикасна. Се запрашала ли Владата зошто постои толкав сомнеж во вакцините? Што се случува? Зошто властите чекаат, слично како и со набавката, и не почнуваат со кампања за вакцинација. Сведоци сме дека на социјалните мрежи секојдневно нѐ бомбардираат со секакви теории на заговор поврзани и со вирусот и со вакцините. А верувајте, Македонците во голем процент и веруваат во нив (повеќе отколку во вирусот и во вакцината заедно). Зошто сѐ уште не почна јавната едукација за безбедноста и за целиот процес на имунизација?
Владата го усвои планот за имунизација, но колку навистина е подготвена нашата држава за тоа, ќе видиме секако кога ќе ни пристигнат вакцините. Дотогаш само да се надеваме дека нема да нѐ зафати некој трет бран и нема повторно да ни се наполнат болниците.
