Швајцарскиот тенисер Станислас Вавринка истакна дека Новак Ѓоковиќ заедно со Рафаел Надал и Рожер Федерер ги поместија границите на тенисот.

– Не очекувате еден тенисер да биде подготвен да ги освои сите четири грен слем турнири, но тоа што ни го прикажаа Новак, Рожер и Рафа во овие 15 години е неверојатно. Тие ги поместуваат границите, во смисол на тоа колку добро може да играте – вели Вавринка кој смета дека Ѓоковиќ највеќе напредуваше од големата тројка.
– Новак отиде многу подалеку во последните неколку години. Неговата игра е нешто посебно.

Според швајцарскиот тенисер, Новак Ѓоковиќ има изгледни шанси да триумфира на УС Опен и со тоа да стане првиот тенисер по Род Лејвер кој успеал да победи на сите четири грен слем турнири во една година.

– Тешко е да се каже кој ќе победи. Имам чувство дека Новак ќе триумфира поради начинот на кој игра, како ги решава дуелите и поради тоа што секогаш наоѓа начин како да победи. Имам чувство дека Новак ќе биде тој што ќе победи – вели Вавринка.