Во изминатиот период по тригодишна пауза во мото крос натпреварувањата се врати еден од најдобрите возачи во историјата на овој спорт, Христијан Илиоски, клуб МК Пелистер.

Тој успеа на својот „кам-бек“ да го освои првото место, поточно на трката во Орман, Скопје, во организација на МК Мотори и МК Вардар, и победи со резултат 24:04.80 минути, уште еднаш потврдувајќи ја љубовта и желбата за мотокрос.

Но, секако за секој спортист, за да остваруваат врвни резултати се потребни неопходните услови, така е и во случајот со битолчанецот Илиоски кој вели дека му се потребни средства за да може да учествува на повеќе трки.

– По три години пауза повторно се враќам на патеките, мото кросот е тоа што го сакам и знам. Сè уште можам да дадам придонес за развој општ и свој. Сум имал паузи во кариерата најчесто од финансиски причини, но кога и малку се создаваат услови се враќам и се трудам да остварам некои мои цели.

И впечатоците ми се дека уште многу треба да се прави и да се придонесува за подобро и повисоко ниво за спортот кој го сакам и како само задача ми е тоа да го сторам.

Периодот што претстои ќе дадам сè од себе за добри резултати повторно. А предизвикот е да се најдат спонзори кои ќе ме поткрепат за да се создадат услови да учествувам на повеќе трки бидејки мото кросот како и секој спорт бара многу напорна работа, средства за тренинзи и пoдобра моја техничка опременост – ни изјави Илиоски.

Се очекува нов Мото Крос Натпревар кој се најавува на патеката Лагово, Прилеп, закажан за 25 април.