Илија Николовски: Новата методологија ќе донесе поголеми пензии
Добро е што ќе се менува методологијата за усогласување на пензиите, оценува претседателот на Партијата на пензионери, Илија Николовски, по изјавата на премиерот Зоран Заев дека е донесена одлука за нова методолгија според која растот на пензиите ќе зависи од растот на цените, но и и од растот на просечната плата во државата.
Николовски, во изјава за „Слободен печат“, вели дека Партијата на пензионери подолго време алармираше дека е неопходно да се смени методолгијата, да се следат европските искуства, и така да се дојде до поголема пензија.
– Со новата методологија, всушност се залагаме просечната пензија да биде 60 проценти од просечната плата, а минималната пензија да биде 70 проценти од минималната плата. Ние и порано имавме методолгија според која усогласувањето на пензиите се вршеше така што 50 проценти од пензијата се зголемуваше со процентот на растот на трошоците на живот, а 50 проценти со растот на просечната плата во претходниот период. Сега, се уште се размислува за процентуалните удели на усогласување – колкав процент од пензијата ќе се зголеми со процентот на инфлација, а колкав со процентот на растот на платите, но она што се знае е дека пензионерите ќе добиваат значително поголемо зголемување на пензиите отколку што е со сегашната методологија– изјави за „Слободен печат“ Илија Николовски, претседател на Партијата на пензионери.
Тој рече и дека минималните пензии во државава се многу ниски и затоа ќе бараат повремено, кога од некои причини ќе се зголеми ранливоста на овие пензионери, тие да добиваат еднократна помош.
– Партијата на пензионери посветено продолжува да работи за да се изнајде и одржливо решение за усогласување на минималните пензии со минималните плати, што ќе овозможи дополнителна подршка на оваа најранлива група на пензионери и подобрување на нивната економско-социјалната положба со подостоинствени пензии – вели Николовски.
Новата методологија, како што најави Заев, треба да се применува од 1 јануари 2022 година, а усогласувањето на пензиите ќе се врши двапати годишно, во јануари и во јули.
И според сегашната законска регулатива, пензиите се усогласуваат двапати годишно, на 1 јануари и на 1 јули, но усогласувањето зависи од инфлацијата. Можно е и усогласување со платите, но само ако има пораст на минималната плата во тековната година за повеќе од 15 проценти и пораст на просечната плата во претходната година за повеќе од 5 проценти. Дополнително, усогласување е можно и во случај ако бруто-домашниот производ во претходната година има реален пораст повеќе од 4 проценти. Овие услови, и во „нормални“ услови тешко се исполнуваат, а во пандемиски се невозможни.