Играчите на Арсенал застанаа зад Џака
Гранит Џака во неделата влезе во дуел со навивачите на Арсенал кои го исвиркуваа додека го напушташе теренот. Швајцарскиот репрезентативец по напуштањето на теренот го соблече дресот и веднаш замина во соблекувалната што дополнително ги иритираше фановите.
Веќе наредниот ден, тренерот Унаи Емери на прес конференција не можеше со сигурност да потврди дали Џака ќе остане капитен на Арсенал, но сите дилеми ги разреши голманот Емилијано Мартинез.
– Тој е вистински лидер и затоа ја има нашата поддршка. Гранит е разочаран бидејќи добра личност и го сака овој клуб. Менаџерот ќе одлучи дали Џака останува капитен, но во овие моменти сме сите со него. Сите знаеме колку го сака овој клуб, беше емотивен и брзоплето изреагира во неделата – рече Мартинез.
Џака не беше дел од тимот на Арсенал кој вчеравечер одигра фантастичен натпревар во Лига купот против Ливерпул. Натпреварот заврши со неверојатни 5:5, а Ливерпул обезбеди пласман во следната фаза по подобро изведување на пенали.