Во првиот натпревар од главната фаза на Светското првенство денеска македонската сениорска репрезентација загуби убедливо од Словенија со резултат 21:31.

Одлично го започнавме натпреварот, во првите пет минути водевме со 1:0, 2:1 и 3:2, украдовме топка преку Маркоски, а потоа зголемивме и на плус два благодарение на Лазаров кој беше сигурен од пенал.

Следуваа низа неколку нереализирани напади на двете страни, но и натаму одржувавме минимално водство, имавме 5:4, а Талески го запиша првенецот на Мундијалот и за 6:4, но веднаш возврати крилото Гајиќ. Лазаров не успеа да го пронајде Пешевски, казнија противниците преку Доленец за нов егал на средбата во Каиро.

Во незгоден момент Кузмановски доби две минути исклучување, тоа го искористија Словенците со погодок преку левото крило Хенигман за нивна позитива од 7:8 и тука како да застанавме.

Митревски со своите одбрани го одржуваше и натаму нашиот тим резултатски, но ние повторно бевме со играч помалку откакоа две минути доби Талески, и тоа знаеше да го искористи ривалот кој се одлепи на „плус два“ со голот на Мачковшек.

Почнавме да грешиме во нападот поради сè поцврстата одбрана на Словенија која зголеми на 9:12 со погодокот на Благотиншек, но и голманот Лесјак кој веќе собра 10 одбрани, а ние скоро девет минути бевме без погодок и првото полувреме го завршивме со негатива од „минус четири“.

На стартот од вториот дел продолжија нашите грешки, тешко доаѓавме до реализација, Лесјак постепено ги запираше нашите удари, тоа беше наградено од неговите соиграчи тресејќи ја сè почесто нашата мрежа. Немавме решение за брзиот Зарабец, за Мачковшек, им се придружуваше Доленец, за веќе големи 12:20, како најава за третиот пораз на Македонија на ова СП.

Добија шанса и резервите на овој меч, Серафимов го замени Лазаров, а Томовски влезе во игра како замена за Митревски. Втората наша голманска опција за краток период запиша три одбрани колку да намалиме барем нешто, а во тоа придонесе и младиот десен бек Серафимов со неколку голови.

Словенија ја докажа фаворитската улога, и со новите бодови ја продолжи трката за една од првите две позиции во групата кои водат во четвртфиналето, а за нас останува да го поправиме впечатокот и да бараме позитивни резултати против Русија и Белорусија за што подобар пласман.

СП Египет 2021

Главна фаза

Македонија-Словенија 21:31 (9:13)

Група „4“

Македонија-Словенија: Митревски (8 одб.), Томовски (5 одб.), Стоилов 1, Кузмановски 4, Лазаров 5, Талески 3, Димитриоски 2, Пешевски 2, Серафимов 2, Поповски 1, Танкоски 1.